24. Quæ de spatii mensura diximus, haud difficulter ad tempus transferentur, in quo
itidem nullam habemus certam, & constantem mensuram. Desumimus a motu illam,
quam possumus, sed nullum habemus motum prorsus æquabilem. Multa, quæ huc
pertinent, & quæ ad idearum ipsarum naturam, & successionem spectant, diximus in
notis. Unum hic addo, in mensura temporis, ne vulgus quidem censere ab uno tempore
ad aliud tempus eandem temporis mensuram transferri. Videt aliam esse, sed æqualem
supponit ob motum suppositum æqualem. In mensura locali æque in mea sententia, ac
in mensura temporaria impossibile est certam longitudinem, ut certam durationem e sua
sede abducere in alterius sedem, ut binorum comparatio habeatur per tertium. Utrobique
alia longitudo, ut alia duratio substituitur, quæ priori illi æqualis censetur, nimirum nova
realia punctorum ejusdem decempedæ loca novam distantiam constituentia, ut
[276]
novus ejusdem styli circuitus, sive nova temporaria distantia inter bina initia, & binos
fines. In mea Theoria eadem prorsus utrobique habetur analogia spatii, & temporis.
Vulgus tantummodo in mensura locali eundem haberi putat comparationis terminum:
Philosophi ceteri fere omnes eundem saltem haberi posse per mensuram perfecte
solidam, & continuam, in tempore tantummodo æqualem: ego vero utrobique æqualem
tantum agnosco, nuspiam eandem.
Eadem ad tempus
transferenda, sed
in eo etiam vulgo
notum esse,
intervallum
temporarium non
posse transferri
idem pro
comparatione
duorum: errari ab
eo circa spatium.
