ejusdem causam, ac num. 502 diffractionem expono, quæ est quædam inchoata refractio, sive
reflexio.
Post lucem ex igne derivatam, quæ ad oculos pertinet, ago brevissime num. 503 de sapore, &
odore, ac sequentibus tribus numeris de sono: tum aliis quator de tactu, ubi etiam de frigore,
& calore: deinde vero usque ad num. 514 de electricitate, ubi totam Franklinianam Theoriam
ex meis principiis explico, eandem ad bina tantummodo reducens principia, quæ ex mea
generali virium Theoria eodem fere pacto deducuntur, quo præcipitationes, atque
dissolutiones. Demum num. 514, ac 515 magnetismum persequor, tam directionem explicans,
quam attractionem magneticam.
Hisce expositis, quas ad particulares etiam proprietates pertinent, iterum a num. 516 ad finem
usque generalem corporum complector naturam, & quid materia sit, quid forma, quæ censeri
debeant essentialia, quæ accidentialia attributa, adeoque quid transformatio sit, quid alteratio,
singillatim persequor, & partem hanc tertiam Theoriæ mesa absolve.
De Appendice ad Metaphysicam pertinente innuam hic illud tantummodo, me ibi exponere de
anima illud inprimis, quantum spiritus a materia differat, quem nexum anima habeat cum
corpore, & quomodo in ipsum agat: tum de DEO, ipsius & existentiam me pluribus evincere,
quæ nexum habeant cum ipsa Theoria mea, & Sapientiam inprimis, ac Providentiam, ex qua
gradum ad revelationem faciendum innuo tantummodo. Sed hæc in antecessum veluti
delibasse sit satis.
