Hæc ibi Newtonus, ubi is quidem magnos in Philosophia progressus facturum arbitratus est
eum, qui ad duo, vel tria generalia motus principia ex Naturæ phænomenis derivata
phænomenorum explicationem reduxerit, & sua principia protulit, ex quibus inter se diversis
eorum aliqua tantummodo explicari posse censuit. Quid igitur, ubi & ea ipsa tria, & alia
præcipua quæque, ut ipsa etiam impenetrabilitas, & impulsio reducantur ad principium
unicum legitima ratiocinatione deductum ? At id per meam unicam, & simplicem virium
legem præstari, patebit sane consideranti operis totius Synopsim quandam, quam hic
subjicio; sed multo magis opus ipsum diligentius pervolventi.